Nung minsang dumalaw ako sa
 	inyo, ayaw mo pa, pinilit pa
 	kita. Akala ko tuloy sabi mo:
 	"Maligo ka muna!"
	ayun pala: "Baka maligaw ka!"
	
	Nung minsang dumalaw ako sa inyo,
	naligaw nga ako, walang may alam ng 
	Mojica st.: "Tatlong kanto mula
 	dito", dalawa lang pala.
	Sabi mo may basketball court,
	di mo naman sinabi kung 
	whole court o half court.
	Nasa South na ako wala pa
	rin akong nakikitang basketball	
	court na whole, half meron.

	Tumawag pa ako sa tindahan,
	buti kilala ka ng may-ari
	sabi nya: "Paglampas ng buko"
	Kumatok nga ako paglampas ng buko
	"Ang tagal naman"
	"Hindi dito sa kabila!"

	At naandon ka nga.

	Halos tumalon ang puso ko
	sa takot, sa kaba.
	Muntik pa akong sunggaban
	ng aso ninyo.

	Nung minsang dumalaw ako sa inyo,
	di ako makapagsalita, di ako
 	mapakali, nilalaro ko lang ang aso
	ninyo.
	Pinapanood lang kitang matulog

	Nakangiti ka.
	Nakangiwi ako.

	At biglang nagsalita nga ako.
	
	Nung minsang dumalaw ako sa
 	inyo, para akong eroplanong 
	biglang nag-crush land:
 	"Pilot error".

	Hindi na lang sana ako
	nagsalita.
	Nung dumalaw ako sa inyo.


			 j.p. abad